Nigeria TV Info

Karancin Man Fetur Na Gabatowa Yayin da NUPENG da Kamfanin Mai na Dangote Suka Yi Sabani

LAGOS — ’Yan Najeriya na iya fuskantar karancin man fetur a mako mai zuwa sakamakon yajin aikin da direbobin manyan motocin dakon mai ke shirin yi, ƙarƙashin ƙungiyar ma’aikatan mai da iskar gas ta Najeriya (NUPENG). Ƙungiyar ta yi barazanar dakatar da ɗibo man fetur saboda rikicin da ke kunno kai tsakaninta da shugabancin Kamfanin Mai na Dangote.

Rikicin ya samo asali ne daga shirin kamfanin na shigo da motocin dakon mai guda 4,000 da ke amfani da iskar gas (CNG) domin rarraba mai kai tsaye zuwa wuraren sayarwa. An shirya fara shirin ne tun daga ranar 15 ga Agusta, amma ya samu jinkiri saboda matsalolin jigilar kayayyaki daga kasar China. Duk da haka, kamfanin ya tabbatar da cewa zai fara aiki da zarar an samu wadatattun motocin.

Sai dai a wata sanarwa da Shugaban NUPENG, Williams Akporeha, da Sakatare Janar, Afolabi Olawale, suka rattaba wa hannu tare, ƙungiyar ta zargi shugabancin kamfanin da "mugayen dabi’un rashin mutunta ma’aikata" da za su iya yin barazana ga rayuwar mambobin reshen direbobin tankoki.

A cewar NUPENG, wanda ya kafa kamfanin, Aluko Dangote, ya dage cewa sabbin direbobin da za a ɗauka don motocin CNG ba za a ba su damar shiga kowace ƙungiyar kwadago ba. Ƙungiyar ta yi Allah-wadai da wannan mataki, tana mai kiran shi da take hakkin ma’aikata na shiga ƙungiya, wanda kundin tsarin mulkin Najeriya na 1999 da kuma yarjejeniyoyin ƙwadago na duniya suka tabbatar.

" Matsayar da Kamfanin Dangote ya ɗauka kai tsaye kalubalanci ne ga haƙƙin dimokuraɗiyya da kuma keta dokokin ƙwadago na duniya da Najeriya ta rattaba hannu a kai," in ji sanarwar.

Yayin da ɓangarorin biyu suka dage kan matsayarsu, akwai fargabar karancin mai a fadin ƙasar idan direbobin tankoki suka cika barazanar su ta daina aiki.