NIGERIA TV INFO — LABARAN TSARO DA SARARIN SAMANIYA NA DUNIYA

China Ta Bayyana Shirin “Jirgin Yakin Sararin Samaniya” Mai Iko da Harba Makamai da Sakin Jiragen Yaki Marasa Matuki

Kasar China ta bayyana wani babban shiri na kirkirar jirgin yaki na sararin samaniya wanda a nan gaba zai iya sakin jiragen yaki marasa matuki tare da harba makamai masu gudun gaske (hypersonic missiles) daga kusa da sararin samaniya.

Kafafen yada labarai na gwamnatin China sun saki bidiyon kwamfuta da ke nuna yadda aka tsara wannan jirgi mai suna “Luanniao.” Bidiyon ya nuna jirgin mai siffar alwatika yana tafiya a gefen sararin duniya, yana harba makamai tare da sakin jiragen yaki da dama.

An ce jirgin zai kai tsawon kusan kafa 800, wanda zai iya zama mafi girma irinsa a duniya. Rahotanni sun ce zai iya daukar jiragen yaki marasa matuki har 88 masu suna “Xuan Nu.”

China ta ce wannan jirgi na iya fara aiki cikin shekaru 30 masu zuwa, a wani bangare na kokarinta na fadada karfin ta na sararin samaniya da jiragen sama. Kamfanin Aviation Industry Corporation of China (AVIC) ne ke kula da aikin.