NIGERIA TV INFO — LABARAN TSARO / NA ƘASA

Ministan Tsaro Ya Gargadi Masu Tallafa wa ’Yan Ta’adda, Tinubu Ya Bai Wa Jami’an Tsaro Cikakken Izini

Abuja — Ministan Tsaro, Janar Christopher Musa (mai ritaya), ya yi gargaɗi mai tsauri ga duk masu taimaka wa ’yan ta’adda, ’yan fashi, ’yan tawaye da sauran masu aikata laifuka, yana mai umartar su da su daina nan take ko su fuskanci hukuncin doka.

Janar Musa ya ce Shugaba Bola Ahmed Tinubu ya bai wa hukumomin tsaro cikakken izini domin su bi ’yan ta’adda da kuma duk wanda ke ba su tallafi ta kowace hanya.

Ministan ya bayyana hakan ne a ranar Asabar yayin da yake bako na musamman a Gasar Golf ta Bikin Tunawa da Sojojin Nijeriya ta 2026, wadda aka gudanar a TYB Golf Resort da Country Club, Barikin Yar’Adua.

Yana kira ga haɗin kan ƙasa wajen yaki da rashin tsaro, Musa ya bukaci ’yan Nijeriya da su ci gaba da goyon bayan sojoji da sauran hukumomin tsaro domin dawo da zaman lafiya.

“Na ke kira ga duk ’yan Nijeriya da su ci gaba da goyon bayan sojoji da hukumomin tsaro domin samar da zaman lafiya. Ga wadanda har yanzu suke taimaka wa ’yan fashi, masu laifi, ’yan tawaye da ’yan ta’adda, su daina,” in ji shi.

Ya yi amfani da karin magana mai ƙarfi inda ya ce duk wanda aka samu yana taimaka wa masu laifi za a dauke shi a matsayin ɗaya daga cikinsu.

“An ce abokin barawo ma barawo ne. A gare mu, idan muka same ka a filin daga tare da su, duk abin da ya same su zai same ka,” in ji Musa.

Ya jaddada muhimmancin tattara bayanan sirri, yana kira ga ’yan ƙasa masu bin doka da su rika bai wa hukumomin tsaro sahihan bayanai a kan lokaci.

Janar Musa ya ce Bikin Tunawa da Sojoji dama ce ta girmama sojoji masu aiki da kuma waɗanda suka rasu suna hidima ga ƙasa.

Ya tabbatar wa ’yan Nijeriya cewa sojojin ƙasa ba za su yi kasa a gwiwa ba wajen kare ƙasa da tabbatar da dorewar zaman lafiya da tsaro.