Nigeria TV Info 

EU ta ware €235m domin agajin jinƙai a Yammaci da Tsakiyar Afirka

Ƙungiyar Tarayyar Turai (EU) ta sanar da ware €235 miliyan domin tallafin jinƙai a ƙasashen Yammaci da Tsakiyar Afirka, sakamakon ƙaruwa rikice-rikice, yunwar abinci da matsalolin sauyin yanayi da ke addabar yankin.

Wannan tallafi zai taimaka wa mutanen da suka rasa muhallansu, al’ummomin da ke karɓar ‘yan gudun hijira, da yankunan da ke da wahalar isa, inda za a samar da abinci, magunguna, ruwa mai tsafta, matsuguni da tallafin ilimi.

EU ta ce yankin Sahel zai samu kusan €75m, yayin da Chadi za ta samu sama da €72m saboda matsalar rikicin Sudan da gudun hijira. Jamhuriyar Afirka ta Tsakiya za ta samu €22m, Kamaru €16.6m, Mauritania €4.8m, sannan Najeriya za ta karɓi €33m domin tallafin lafiya da abinci a Arewa maso Gabas da Arewa maso Yamma.

Jami’ar EU ta bayyana cewa rikice-rikice, talauci da sauyin yanayi na ƙara dagula matsin rayuwa a yankin, inda miliyoyin mutane ke buƙatar agajin gaggawa.