Nigeria TV Info 

China Ta Soke Harajin Kaya Ga Kusan Duk Kasashen Afrika Sai Daya

Gwamnatin China ta sanar da cire harajin shigo da kaya daga kasashen Afrika 53, lamarin da zai bai wa kasashen damar fitar da hajojinsu zuwa kasuwar China ba tare da biyan haraji ba. Kasar Eswatini ce kadai aka cire daga tsarin saboda dangantakarta da Taiwan maimakon China.

Sabon tsarin ya fara aiki daga ranar 1 ga Mayu, 2026, inda ya fadada tsohon shirin da ya shafi kasashe masu tasowa kaɗai. Yanzu manyan kasashe irin su Najeriya, South Africa, Kenya da Egypt za su amfana daga damar kasuwancin ba tare da haraji ba.

China ta bayyana cewa manufar wannan mataki ita ce karfafa alakar tattalin arziki da kasuwanci tsakaninta da Afrika. Ana sa ran kayayyaki irin su koko, kofi, avokado, lemun citrus da ruwan inabi za su samu kasuwa mai kyau a China.

Masana sun ce wannan mataki zai iya taimakawa bunkasar tattalin arzikin Afrika, amma sun gargadi cewa yawancin kasashen Afrika har yanzu suna fitar da albarkatun kasa ne kawai yayin da suke shigo da kayayyakin masana’antu daga China.