Nigeria TV Info 

China Ta Sake Jaddada Manufar “One China”, Ta Gargadi Najeriya Kan Harkokin Taiwan

Gwamnatin ƙasar China ta sake jaddada matsayarta kan manufar “One China”, tare da gargadin cewa duk wani yunkuri na ƙarfafa alaƙa da Taiwan a Nigeria na iya kawo cikas ga dangantakar diflomasiyya tsakanin ƙasashen biyu.

Jami’ar ofishin jakadancin China da ke Abuja, Dong Hairong, ta bayyana hakan yayin wani taron manema labarai mai taken “Fahimtar Manufar One China”. Ta ce tun bayan kulla dangantakar diflomasiyya a shekarar 1971, Najeriya ta amince da gwamnatin China a matsayin halastacciyar gwamnati guda ɗaya tilo da ke wakiltar China baki ɗaya.

China ta nuna damuwa kan wasu hulɗoɗi tsakanin jami’an Taiwan da wasu ‘yan jaridar Najeriya, tare da batun mayar da ofishin kasuwancin Taiwan zuwa Abuja. Beijing ta ce irin waɗannan matakai na iya saɓawa yarjejeniyar da ke tsakanin Najeriya da China kan manufar One China.

Jami’ar ta tunatar da cewa Najeriya ta taba mayar da ofishin Taiwan daga Abuja zuwa Lagos domin mutunta manufar One China, tana mai cewa hakan ya taimaka wajen ƙarfafa alaƙar ƙasashen biyu.

Ta kuma bukaci kafafen yaɗa labarai da sauran masu ruwa da tsaki a Najeriya su guji goyon bayan duk wani ra’ayi na ballewar Taiwan daga China.